LA TERCERA

Urkullu lehendakaria New Yorkeko Eusko Etxearen Mendeurreneko ekitaldietan partaide izango da urrian

2013/07/29

Iñigo Urkullu Estatu Batuetara joango da urrian, Europar Batasunetik kanpo lehendakari gisa egiten duen lehenengo bidaia ofizialean. Lehendakariak New York, Washington DC eta Milwaukee hiriak bisitatuko ditu urriaren 8tik 13ra bitartean, azken xehetasunak finkatzeke, eta, Diasporari dagokionez, New Yorkeko Eusko Etxea-ren mendeurreneko ekitaldietan hartuko du parte eta Estatu Batuetako euskal komunitateko ordezkariekin bilduko da Etxeorratzen Hirian zein Washington hiriburuan.

Eusko Jaurlaritzako lehendakari Iñigo Urkullu

Vitoria-Gasteiz/New York. Azken hilabeteotan Estatu Batuetan ofizialtsua zena ofizialki baitetsi du Eusko Jaurlaritzak eta ohar batean adierazi du Iñigo Urkullu lehendakaria Estatu Batuetara bidaiatuko dela datorren urrian, besteak beste New Yorkeko Eusko Etxearen mendeurreneko ekitaldietan parte hartzera, orohar helburu politiko, ekonomiko eta kulturalak dituen astebete eskaseko joan-etorrian.

Lehendakariak New York, Washington hiriburua eta Milwaukee hiria, Wisconsin estatuan, bisitatuko ditu, Kanpo Harremanetarako idazkaritza nagusiko arduradunez gain Arantza Tapia Ekonomia Garapen eta Lehiakortasun sailburua  ere --bere arloko ordezkaritza zabalago baten buru-- bilduko duen bidaian.

NABO eta Estatu Batuetako euskal etxeetako ordezkariekin ezezik, Urkullu hainbat agintari politikorekin bilduko da: kongresistekin, senatariekin, alkate eta gobernadoreekin, eragile ekonomikoekin, Estatu Batuetan ezarritako euskal enpresen ordezkariekin; Nazio Batuen Erakundearen nazioarteko eragile eta kideekin; eta Columbiako Unibertsitateko kideekin, Jaurlaritzaren oharrak zabaldu duenez.

Euskal diasporaren alorrean, New Yorkeko Eusko Etxea-ko mendeurreneko ekitaldietan hartuko du parte Manhattan eta Brooklyn-en, eta Washington hirian ere bertako euskal etxeko kideak agurtuko ditu. Ofizialki 1913ko urriaren 12an sortua, ofizialki "Eusko Etxea of New York" izena duen erakundea Estatu Batuetako euskal etxe zaharrena da, XIX. mende erdialdetik hona bestelako euskal instituzioak egon izan badira ere Estatu Batuetan euskaldunek euskaldunentzat sortuak.

Euskalkultura